Bereta: Më vjen keq për Interin

"Më vjen keq për Interin, por ata kanë ende mundësi ta fitojnë titullin." Siena e Mario Beretës e prishi festën e zikaltërve për titullin, duke arritur të barazojë 2-2 në San Siro. "Nuk u dorëzuam, patëm edhe pakëz fat, - tha trajneri i bardhezinjve. -Çfarë i ndodhi Interit? Nuk e di, janë vlerësime të cilat i takojnë Mançinit. Zikaltrit sulmuan shumë, por, kur koha që ke në dispozicion sa vjen e pakësohet, mund të të krijohet njëfarë nervozizmi." Pavarësisht nga sezoni i shkëlqyer, Berreta nuk është konfirmuar ende për sezonin e ardhshëm. "Rëndësi ka që siguruam qëndrimin në kategori, - tha ai. - Unë e kam thënë se do të qëndroja me kënaqësi, por nga ana e klubit nuk më ka mbërritur asnjë sinjal. E arritëm shpëtimin përpara 8 ditësh, por ende nuk më ka thënë askush ndonjë gjë. Kam bërë disa kërkesa të ekuilibruara, pa e tepruar, për sa u takon kërkesave teknike dhe ekonomike."

Në fund të ndeshjes, trajneri Bereta është fyer nga disa tifozë interistë pak para se të hipte mbi makinën e tij dhe është shoqëruar deri në dalje të Milanos i rrethuar nga forcat e rendit.