Apolonia, në Bilisht me hapin e kryesuesve

Fierakët kanë marrë 3 pikë me vlera në Bilisht, ndërkohë që pas ndeshjes ka pasur protesta nga vendësit për gjykimin. Duke i lënë mënjanë protestat, që në fakt kanë zgjatur shumë, duhet thënë se pjesa e parë ka qenë e vakët, pa shumë raste në portat respektive, por me një epërsi të miqve nga Fieri. Në minutën e 2-të, trajneri mik bëri ndërrimin e detyruar të Bratjes, vendin e të cilit e zuriGuna. Gërxho, në minutat '7 dhe '11, për pak sa nuk ka shënuar. Në minutën e 33‑të, Junior ka kaluar Apoloninë në avantazh, duke përfituar nga një gabim i mbrojtjes bilishtare. Rasti i parë për vendësit do të shënohet në minutën e 41‑të, kur Pengu gjuan jashtë kuadratit, ndërsa Meto për miqtë, në minutën e fundit të kësaj pjese, ka pasur një mundësi të artë për golin e dytë. Shpëtimtar është bërë portieri Trajanofski. Pjesa e dytë dhuroi mjaft emocione në fushë, ndërkohë që gjyqtari Meta nuk i kurseu kartonët. Në minutën e 51‑të, miqtë, me një kundërzbritje, shënojnë golin e dytë, me anë të Delioski, ndërsa bilishtarët protestojnë tek një prej anësorëve, duke pretenduar për pozicion jashtë loje. Me rezultatin 2‑0, fierakët ndihen më të qetë dhe trajneri Haxhiu bën lëvizjet e tij, duke hequr Juniorin për Dhramin e Delioskin për Çerçizin. Ndërkohë, vendësit zgjohen dhe në minutën e 57‑të pretendojnë edhe për një 11-metërsh për prekje të topit me dorë në zonë nga një mbrojtës fierak. Kostovski lëshon një "bombë" në të 66‑ën, por topi përfundon jashtë. Në minutën e 78‑të, Xhika, pas një goditjeje nga këndi, kërcen bukur dhe shkurton diferencën. Pas këtij goli, vendësit mbeten me 10 veta, sepse Bajrami merr kartonin e dytë të verdhë. Në këtë moment dëmtohet edhe Pengu, por trajneri Kushe i kishte kryer të tri ndërrimet. Edhe me dy lojtarë më pak, bilishtarët kanë krijuar raste për barazim. Agolli ka pasur 2 mundësi të mira, por gjithçka mbyllet 1‑2. Një fitore me vlera për fierakët, ndërkohë që presidenti i Bilisht-Sportit, Xhaçi, ka deklaruar se do ta tërheqë ekipin nga gara në shenjë proteste për gjykimin.

Thanë pas ndeshjes

Gëzim Xhaçi, president i Bilisht‑Sportit: "Jam i irrituar për gjykimin. Do të bëjmë ankimim në federatë dhe, nëse nuk merren masa, deklaroj se do të tërhiqem."

Gerti Haxhiu, trajner i Apolonisë: "Ne e kishim deklaruar se edhe barazimi do të ishte humbje për ne. Ishte një fitore karakteri, sepse pashë një kundërshtar mjaft të fortë në fushë. Ne e kishim nën kontroll rezultatin gjatë gjithë ndeshjes. Më vjen mirë që po ecim me hapin e kryesuesve dhe tani duhet të mendojmë për ndeshjen e radhës."