Daja: S'ka "hakmarrje", duam tri pikët!

Kur na ndajnë edhe 3 takime nga mbyllja e sezonit futbollistik 2007-2008, akti i parë për dinamovitët do të jetë sot, në orën 16:30, në stadiumin "Selman Stërmasi". Në mediat është folur për një "hakmarrje" nga ana e bluve në ndeshjen e sotme ndaj Besës, për atë eliminim gjatë sezonit të shkuar në kupë, por trajneri Ilir Daja, me anë të një prononcimi për gazetën "Sporti shqiptar" kërkon t'i hedhë poshtë këta zëra. Sipas numrit 1 të stolit së Dinamos, skuadra që ai drejton do të luftojë vetëm për tri pikët ndaj Besës dhe nuk mendon për ndonjë "hakmarrje", por vetëm për ecurinë e kampionatit. "Jemi përpara një ndeshjeje tepër të rëndësishme për vetë pozitat e të dy skuadrave në tabelën e superiores. Gjendja e grupit tonë është pothuajse e plotë, pasi kemi Diopin me tre kartonë, i cili do të mungojë, ndërkohë që edhe Allmuça ka bërë gjatë gjithë javës stërvitje të diferencuar dhe nuk e dimë nëse do ta kemi në dispozicion. Është një ndeshje e vështirë nisur nga fakti se do të përballemi me vendin e tretë dhe, duke parë kontigjentin e Besës, i cili është i përbërë me futbollistë tepër cilësorë, por edhe nga rezultatet që kanë marrë në ndeshjet e fundit, përveç humbjes së javës së shkuar ndaj Partizanit. Mjaftojnë këta elementë të lartpërmendur për të kuptuar rëndësinë dhe forcën e kundërshtarit. Gjithsesi, Dinamo është përgatitur seriozisht për këtë takim. Por për ne nuk ka më vend dhe kohë për humbje, pasi duhet të marrim maksimumin e pikëve. Për sa u takon "ngacmimeve" mediatike ndaj nesh, tashmë jemi mësuar. Por besoj se këtu gazetarët kërkojnë të "nxisin" një ndeshje sa më të bukur në "Selman Stërmasi". Por nuk përjashtohet mundësia që ky takim të nxitet nga një palë e tretë, pasi gjithmonë ndeshjet tona fryhen mediatikisht. Nuk mendoj se bëhet fjalë për "hakmarrje". Ne do të kërkojmë vetëm tri pikët për të ruajtur vendin e parë, ndërkohë që në anën tjetër edhe Besa do të bëjë detyrën e saj për të arritur tek fitorja dhe për të arritur objektivat e saj. Është thjesht një përplasje e radhës midis nesh dhe Besës dhe nuk besoj se kavajasit kanë diçka për t'u "hakmarrë" ndaj nesh, ndërkohë që, siç e thashë më lart, edhe ne s'kemi asgjë ndaj tyre. "Hakmarrja" jonë në këtë rast është vetëm fitimi i tri pikëve dhe vazhdimi i rrugës sonë drejt titullit kampion,"- e ka mbyllur prononcimin e tij trajneri dinamovit Ilir Daja, i cili kërkon të ruajë vëmendjen tek takimi i sotëm ndaj Besës dhe të mos shpërqendrojmë grupin e futbollistëve blu.